| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 18.69 | Dem. 18.72 (English) | >>Dem. 18.75 |
18.71οὐδὲ νῦν περὶ τούτων ἐρῶ . ἀλλʼ ὁ τὴν Εὔβοιαν ἐκεῖνος σφετεριζόμενος καὶ κατασκευάζων ἐπιτείχισμʼ ἐπὶ τὴν Ἀττικήν , καὶ Μεγάροις ἐπιχειρῶν , καὶ καταλαμβάνων Ὠρεόν , καὶ κατασκάπτων Πορθμόν , καὶ καθιστὰς ἐν μὲν Ὠρεῷ Φιλιστίδην τύραννον , ἐν δʼ Ἐρετρίᾳ Κλείταρχον , καὶ τὸν Ἑλλήσποντον ὑφʼ αὑτῷ ποιούμενος , καὶ Βυζάντιον πολιορκῶν , καὶ πόλεις Ἑλληνίδας τὰς μὲν ἀναιρῶν , εἰς τὰς δὲ τοὺς φυγάδας κατάγων , πότερον ταῦτα ποιῶν ἠδίκει καὶ παρεσπόνδει καὶ ἔλυε τὴν εἰρήνην ἢ οὔ ; καὶ πότερον φανῆναί τινα τῶν Ἑλλήνων τὸν ταῦτα κωλύσοντα ποιεῖν αὐτὸν ἐχρῆν , ἢ μή ;
18.72εἰ μὲν γὰρ μὴ ἐχρῆν , ἀλλὰ τὴν Μυσῶν λείαν καλουμένην τὴν Ἑλλάδʼ οὖσαν ὀφθῆναι ζώντων καὶ ὄντων Ἀθηναίων , περιείργασμαι μὲν ἐγὼ περὶ τούτων εἰπών , περιείργασται δʼ ἡ πόλις ἡ πεισθεῖσʼ ἐμοί , ἔστω δʼ ἀδικήματα πάνθʼ ἃ πέπρακται καὶ ἁμαρτήματʼ ἐμά . εἰ δʼ ἔδει τινὰ τούτων κωλυτὴν φανῆναι , τίνʼ ἄλλον ἢ τὸν Ἀθηναίων δῆμον προσῆκε γενέσθαι ; ταῦτα τοίνυν ἐπολιτευόμην ἐγώ , καὶ ὁρῶν καταδουλούμενον πάντας ἀνθρώπους ἐκεῖνον ἠναντιούμην , καὶ προλέγων καὶ διδάσκων μὴ προΐεσθαι διετέλουν . καὶ μὴν τὴν εἰρήνην γʼ ἐκεῖνος ἔλυσε τὰ πλοῖα λαβών , οὐχ ἡ πόλις , Αἰσχίνη .
φέρε δʼ αὐτὰ τὰ ψηφίσματα καὶ τὴν ἐπιστολὴν τὴν τοῦ Φιλίππου , καὶ λέγʼ ἐφεξῆς · ἀπὸ γὰρ τούτων τίς τίνος αἴτιός ἐστι γενήσεται φανερόν .
18.73
Ψήφισμα
ἐπὶ ἄρχοντος Νεοκλέους ,μηνὸς βοηδρομιῶνος ,ἐκκλησία σύγκλητος ὑπὸ στρατηγῶν ,Εὔβουλος Μνησιθέου Κόπριος εἶπεν ·ἐπειδὴ προσήγγειλαν οἱ στρατηγοὶ ἐν τῇ ἐκκλησίᾳ ὡς ἄρα Λεωδάμαντα τὸν ναύαρχον καὶ τὰ μετʼ αὐτοῦ ἀποσταλέντα σκάφη εἴκοσι ἐπὶ τὴν τοῦ σίτου παραπομπὴν εἰς Ἑλλήσποντον ὁ παρὰ Φιλίππου στρατηγὸς Ἀμύντας καταγήοχεν εἰς Μακεδονίαν καὶ ἐν φυλακῇ ἔχει ,ἐπιμεληθῆναι τοὺς πρυτάνεις καὶ τοὺς στρατηγοὺς ὅπως ἡ βουλὴ συναχθῇ καὶ αἱρεθῶσι πρέσβεις πρὸς Φίλιππον ,
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 18.69 | Dem. 18.72 (English) | >>Dem. 18.75 |
